Qarın ağrısı
Qarın ağrısı – baş və diş ağrıları kimi geniş yayılmışdır. Bu əlamət çox zaman sağlamlıqla bağlı ciddi problemdən xəbər verir. Onun səbəbləri ilə tanış olun.
Appendisitə işarə edən qarın ağrısı
Qarnın aşağısında, göbək nahiyəsində sönməyən ağrılar və ya qarnın yuxarı hissəsindən göbəyə yayılan sızıltılar adətən kəskin appendisit zamanı meydana çıxır. Ağrının qəfil zəifləməsi bağırsağın partlamasına dəlalət edir. Belə vəziyyətlərdə təcili tibbi yardım tələb olunur.
Kəskin pankreatitə şübhə doğuran qarın ağrısı
Qarnın yuxarısında əmələ gələrək, kürək, çiyin nahiyəsinə yayılan güclü ağrılar mədəaltı vəzin iltihabında (pankreatit) müşahidə edilir. Bır sıra xəstələrdə kəmərləyici ağrılarla yanaşı, ürəkbulanma, qusma, ağızda quruluq və ya xoşagəlməz dad yaranır. Bu halda da tibbi yardımı gecikdirmək olmaz.
Kəskin qastrit zamanı qarında ağrı
Qida qəbulundan sonra qarında ağırlıq, göbəkdən yuxarıda ağrı, ürəkbulanma, gəyirmə mədədə qastritlə bağlıdır. Belə xəstələr qastroenteroloqun müayinəsindən keçməlidir.
Bağırsaq sancısı qismində qarın ağrısı
Göbək nahiyəsində sancı, ümumi halsızlıq, titrətmə bağırsaq sancısının əlamətidir. Bu problemi aradan qaldırmaq üçün spazmolitik içilməli və yataq rejiminə əməl edilməlidir. Həmçinin gündəlik rasiondan yağlı, duzlu, acı xörəkləri, şirniyyat və şorabaları çıxarmaq məsləhət görülür.
Böyrək mənşəli qarın ağrısı
Yüksək qızdırma, qarın və bel nahiyəsində şiddətli ağrı böyrəyin iltihabı ilə əlaqəlidir. Bu zaman mütləq həkimlə əlaqə saxlanılmalıdır.
Böyrək daşı zamanı qarında ağrı
Qarın, bel və aralıq nahiyəsində kəskin ağrı, sidik ifrazının tezləşməsi böyrək daşı təpəndikdə baş verir. Xəstələrə spazmolitik və isti vanna qəbulu tövsiyə edilir. Sidiyə getdikdə qan aşkarlasanız, dərhal həkimə müraciət edin.
Mədə və onikibarmaq bağırsaq xəstəliklərində qarın ağrısı
Mədə-bağırsaq problemlərində qida qəbulundan sonra göbək hissədə və epiqastral nahiyədə (qarnın yuxarısında) ağrı, qarında köp, gəyirmə yaranır. Bu əlamətlərlə qastroenteroloq məşğul olur.
Xora xəstəliyində qarın ağrısı
Mədə-bağırsaq xorası üçün ağrı, qıcqırma, ağızda turş dad, dilin ağ ərplə örtülməsi, köp xarakterikdir. Ağrı insan ac olduqda yaranır, yedikdə isə keçib gedir. Xorası olan xəstələr mədə həkiminin nəzarəti altında olmalıdır.
Öd kisəsinin iltihabında qarın ağrısı
Sağ qabırğaaltı və ya göbəkdən yuxarıda müntəzəm qaydada formalaşan güclü ağrı, ürəkbulanma, qusma, ağızda acılıq və quruluq, gəyirmə öd kisəsinin iltihabının (xolesistit) təzahürləridir. Ağrının xarakterik cəhəti kürəyə yayılmasıdır. Belə hallarda ödqovucu vasitələr köməyə gəlir.
Nevroz və ya stress vəziyyətlərində qarın ağrısı
Qarında dolanan, sızıltılı ağrılar, ürəkbulanma, halsızlıq və ya əksinə, hiperaktivlik sinir sistemi ilə bağlı ola bilər. Problemi həll etmək üçün sakitləşdirici preparatlar qəbul olunmalı, kofein tərkibli məhsullardan (qəhvə, tünd çay və s.) imtina edilməlidir.
Xülasə
Böyüklərlə yanaşı uşaqlarda qarın ağrısına da tez-tez təsadüf olunur. Gördüyünüz kimi qarın ağrısının səbəbləri müxtəlif olduğundan ev şəraitində kor-koranə müalicə etmək əvəzinə, həkimlə məsləhətləşmək vacibdir. Belə vəziyyətlərdə kolonoskopiya və ya qarın boşluğu orqanlarının ultrasəs müayinəsi aparılır. Nəticələrə əsasən müvafiq müalicə təyin edilir.
